جہلم لائیو (محمد امجد بٹ سے) بلدیہ جہلم میں میگا کرپشن سکینڈل، شہریوں سے وصول کی گئی کروڑوں کی رقوم دوبارہ وصول کرنے کی مہم شروع،
بیس بیس سال پرانے کیس دوبارہ کھول دئیے گئے،
کلرکوں نے شہریوں سے واٹر سپلائی اور سیوریج کے نام پرکروڑوں روپے وصول کرکے ریکارڈ میں درج ہی نہ کئے، چیف آفیسر نے دوبارہ وصولی اور شہریوں پر مقدمات درج کروانے کا حکم دے دیا،
شہری دفتر کے دھکے کھانے پر مجبور، وزیر اعلی پنجاب ، چیف سیکرٹری اور ڈی سی جہلم سے نوٹس لینے کا مطالبہ، بلدیہ جہلم جہاں عرصہ دراز سے کرپشن کے مختلف سکینڈل میں منظر عام پر آنے کے باوجود ذمہ دار صاف بچ نکلنے میں کامیاب ہوئے ہیں وہاں کروڑوں روپے کے بلوں کی وصولی کے بعد مبینہ خرد برد کا ایک میگا سیکنڈل منظر عام پر آیا ہے ،جہاں گزشتہ ادوار میں واٹر سپلائی اور سیوریج کے نام پر کروڑوں روپے کے بل وصول کرنے کے بعد ریکارڈ میں درج ہی نہ کئے گئے اور اب چیف آفیسر کے حکم پر نہ صرف تمام شہریوں کو ہزاروں روپے جرمانوں کے ساتھ نہ صرف بل جمع کروانے کا حکم دیا گیا ہے بلکہ اہلکاروں کو خصوصی طور پر ہدایت کی گئی ہے کہ وہ بل تقسیم کرتے ہوئے شہریوں کو مقدما ت درج کروانے کی دھمکیاں بھی دیں ۔ اس حوالے سے خبریں تحقیقات میں معلوم ہوا ہے کہ جن صارفین نے عرصہ دراز سے بل جمع کروا کے واٹر سپلائی کے کنکشن منقطع کروا دئیے ان سے بقایا جات تو وصول کر لئے گئے لیکن کسی ریکارڈ میں ان کا اندراج نہیں ہے جس سے واضح طور پر اس بات کا امکان ہے کہ پہلے وصول کئے گئے کروڑوں روپے مبینہ طور پر ہڑپ کر لئے گئے ہیں اور اب نقصان پورا کرنے کیلئے شہریوں کو نشانہ بنایا جا رہا ہے جبکہ دفتر جانے والے صارفین سے پندرہ سے بیس سال قبل کی رسیدیں طلب کی جاتی ہیں حالانکہ رسید جاری کرنے کا تمام ریکارڈ بلدیہ میں موجود ہو تا ہے لیکن وصولی پر مامور کلرک پرانے رجسٹر چیک کرنے کی زحمت کرنے کی بجائے صرف رسید لانے کی ضد کرتے ہیں اور بیس سال کی رسید سنبھال کر نہ رکھنے والوں کو دوبارہ واجبات جمع کروانے کا حکم دے دیا جاتا ہے شہریو ں کا کہنا ہے کہ بیس سال پرانی رسدیں اب ہم کہاں سے لائیں بلدیہ نے پیسے وصول کرکے بھی اندراج نہیں کئے جس کی سزا اب غریب لوگوں کو دی جارہی ہے شہریوں نے وزیر اعلی پنجاب ، چیف سیکرٹری اور ڈی سی جہلم سے بلدیہ جہلم کی اندھیر نگری اور لوٹ مار کا نوٹس لینے اور ادائیگی کرنے کے باوجود اندراج نہ کرنے والے کلرکوں اور افسران کے خلاف مقدمات درج کروانے کا مطالبہ کیا ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بلدیہ جہلم میں بیس بیس سال پرانی وصولیوں اور اندراجات نہ ہونے پر شہریوں کو درپیش مشکلات پر چیف آفیسر احسان وڑائچ کا کہنا ہے کہ بلدیہ میں اپنے کنکشن منقطع کروانے والے مکمل ادائیگی کی رسیدیں پیش کردیں تو ان سے بقایا جات وصول نہیں ہوں گے اگر کسی کے پاس رسید نہ ہو تو پھر اس کو نہ صرف رجسٹر میں درج بقایاجات دینے ہوں گے بلکہ کئی سالوں کا جرمانہ بھی ادا کرنا ہوگا انہوں نے کہا کہ جن افسران نے ماضی میں وصولیاں کیں ان کو چاہئیے تھا کہ وہ ریکارڈ پر بھی درج کرتے ، اب شہریوں کو ہر صورت ادائیگی کرنی ہو گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میگا کرپشن سکینڈل بارے کئی ایک شہریوں کا کہنا ہے کہ ہم نے پندرہ پندر ہ سال قبل کنکشن منقطع کروا دئیے اور مکمل ادائیگی کر دی لیکن رسید اتنا عرصہ کون سبنھال کر رکھ سکتا ہے اب پندرہ سال بعد تما م بقایا جات دوبارہ اور جرمانے بھی مانگے جارہے ہیں جبکہ بلدیہ اہلکار شہریوں کے گھروں میں جا کر خواتین کو مقدمہ درج کروانے اور جیل بھجوانے کی دھمکیاں بھی دے رہے ہیں ۔ شہریوں کا کہنا ہے کہ بلدیہ کے پاس خود ریکارڈ ہونا چاہئیے اگر ادارہ خود ریکارڈ نہیں رکھ سکتا تو ہم کو کس جرم کی سزا دی جارہی ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میگا کرپشن سکینڈل میں دلچسپ بات یہ ہے کہ دس دس سال قبل فروخت ہو جانے والے مکانوں کے موجود مالکان کو بھی پرانے بل ادا کرنے کا حکم دے دیا گیاہے جبکہ پرانے مالکان عرصہ دراز سے یہ علاقے ہی چھوڑ چکے ہیں جبکہ فروخت در فروخت ہونے والے مکانوں میں رہائش پذیر کرایہ داروں کو بھی بلوں کی ادائیگی کیلئے سخت دھمکایا جا رہا ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میگا کرپشن سکینڈل کے کئی ایک متاثرین نے بلدیہ کی دھونس اور وصول شدہ واجبات دوبارہ وصول کرنے پر چیف آفیسر احسان وڑائچ کے خلاف عدالتوں سے رجوع کرنے کا فیصلہ کر لیا ہے
